اتينا اليونان- مينيرفا الرومان هي كمان إلها محاربي وحاميي للمدن والحصون والقلاع

إنّا هـ الصفا تكون أبرز صفات أتينا اليونان ومينيرفا الرومان، هادا من أهم الشواهد ع انو هـ الالها أصلا من لبنان. بتعطينا الاساطير والملاحم اليونانيي فكرا شاملي عن اتينا المحاربي. بتفرجينا هيي بتياب الحرب حاملي الترس (ترس غورغونيون اللي بيجابه الزاعقا زاتا) لابسي ع رأسا الخوزي، شاهرا الحربي، مكتسيي بالدرع. وأغلب الاساطير بتقول إنا مولودي من راس زوش وهوي هون إيل كرونوس بزاتو بتقول كمان إنا ولدت من راسو وهيّي ببدلتا الحربيي، وعمتصرخ الصرخات الحربيي.

وهيك متل ما رح نشوف، نبنت ع اسما هياكل، مش بس بكل مناطق لبنان الطبيعي وجوارو، (وبالاخص بآسيا الزغيري ومصر وميزوبوتاميا)، كمان، بالاخص، بكل مناطق العالم اليوناني والروماني.

ونرفعت، ع اسم اتينا، "البالاديا" أو "البتيل"، وكانو يعبدو ع اسم اتينا حجار "بتيل" بتجسّد المدن المسلّحا وجنودا، (ومنلاحظ انو كلمة "بتيل" كلمي فينيقيا مركبي من "بيت" و"ايل" وهيي بالاسا اسم واحد من ولاد اورانوس يعني واحد من اخوة الملك ايل- كرونوس. وبتقلنا سنخوني اتن انو اورانوس بتكر وركب "البتيل" والبعض بيفسّرو هـ العمليي بكلمة "ركب عملاقا بعمليات كيماويي. ع كل حال المهم نعرف انو البتيل صار يعني بعدين شي متل النيازل، منقصد الحجار الواقعا من السما او حجار بيقلّدو فيا الحجار السماويي وبيعملوا مرات اشكال مخروطيي وشبه بشريي.

وكانت حجار الل ينعبدت ع اسم اتينا تحمل اسم "بالاديا" نسبتن لـ لقبا بالاس، وكانو يشوفو فيا صورة بتول ضاهرا بتيابا الحربيي من طاقا بالسما اول ما تزعق الزاعقا متل كأنو صوت الزاعقا هو صوتا.

اتينا- عنت بتشرف ع الصناعات الحربيي المنوعا

وتغنو الشعرا بأتينا المحاربي، ولقّبوا بألقاب كتيري منا "آريا" رفيقة آرس إله الحرب و"المحاربي الاولي" و"العاطيي النصر لمدنا" و"اللي ما بتنغلب" و"القريي". وكإلهة حرب، منشوف عنت بتشرف مش بس ع وضع مخططات المعارك والاعمال الحربيي، كمان ع كل شي بيتعلّق بالحرب متل صناعة المعدات والادوات والاسلحا حتى إنّن لقّبوا بـ "مكنيس" أو "مكينيتس" يعني "الميكانيكي". والكلمي، ع قول فيكتور بيرار، من أصل فينيقي، وتفسرت بآلهة المعسكرات والارجح انها بتعني "إلهة الاليات" وبيرجعلا لعنت الفضل الكبير بإختراع اسلحا واليات كتيري منا، متلما زكرنا، الحربي، والحصان الحربي الل أشهر أنواعو "حصان طروادا" وعتبروا كمان المشرفي ع تدشين الاحصني الحربيي وترويضا ونزيينا، ولهيك تلقبت بـ أتينا هييا وبينسبولا اختراع المركبي الحربيي وبيقولو انا هي عطت آريكيونيوس (اللي تبنوا) اول مركبي حربيي بنجرا الاحصني، وبيوصفلنا ياها الاليازي مسلطني بمركبي حربيي، متل خيّالي ماهرا.

عنت بتخترع البوق ورقصة السيف والترس

وبينسبو لـ عنت- اتينا اختراع الحربي والرقص بالسلاح المعروف بـ الرقصا البيرييي (ما في شك انو لعبة السيف والترس بلبنان هي واحدي من الرقصات الحربيي اللي يمكن تكون ترجع لـ ايام عنت اتينا وكانو يمارسوا بأول أعياد اتينا (ياناتيني بـ اتينا). وبيقولو انو اتينا خترعت هـ الرقصا بعدما نتصرت ع قرايبا الجبابرا منافسين البعل. ويمكن بعد الحرب اللي حكينا عنا واللي نتصرت فيا ع موت، إبن ايل، ويم- نهرا ابن ايل وعلمتن لـ الديسكحور (اللي صرنا نعرف انن اشراف فينيقيي ويمكن يكونو هني هني شحر وشالم المعروفين بـ الالهين الجميلين اللطيفين.