الملحمي-1- قصة البعل وعنت. وصلتنا هـ الملحمي ع 7 لوحات (223). بتبلّش بأنو ياخد ايل قرار بينا هيكل للإله يم- القاضي نهر واللي قرّر يسلمو السلطا. ولهـ السبب بيستدعي كاشر- وخاسس إله البنا والفنون والصنايع الكان معينو ايل ملك ع مصر للإشراف ع البنا.
بس عشتر لإله السقي بيحتجّ ع هـ التدبير لانو ع عتبارو أحق بهـ المركز. وبترد "الشمس نيّر الالها" انو خيار ايل وقع ع يم (شافط البحر)، وانو واجب عليه يبطّل يعارض خصوصن لانو قاصر ومش مجوّز. وهيك بيتسلم يم السلطا من ايل البيسمّيه "إبنو الحبيب يو" بس مع هيدا وكلو ما بتبطّل المعارضا.
وبالعكس، بتزيد ع إيدين البعل هدد ابن داجون الملقب بـ"راكب الغيوم"- متلما رح يتلقّب يهوه بالتورا ع عتبارو اله الارض والشتي والعاصفي والغلات. وهيدا بيخلّي يم يتشكي لايل. بس البعل بيتصلّب بموقفو وبيعمل سورا بينتج عنا عركي ضاريي بينو وبين يم. وبيدعموه كاشر- وخاسس اللي بيصنعلو سلاحين. وبيئسر يمّ وبيتتدخل عشتروت وبتوبّخ البعل لانو كان رح يموّت أسيرو. وبيخجل البعل، بس بيجاوب عشتروت انو يمّ مات وانو الظافر البعل عميتحرق للملك. وتيملك البعل بيبلش ببنا هيكل يكون يليق فيه.وبيشرف خاسس- وكاشر ع البنا: الشغيلي بيحضرو معادن الدهب والفضّا، والحطّابين بيجهزو الارز من حراش لبنان.
وبعد ما ينتهي عمار القصر- الهيكل بتنقام حفلات الإنتهاج. وبيتوجّه البعل صوب الشط تيقابل اعداؤو وبيحتل 99 مديني وبيبسط ملكو ع البلاد.
وبعد توطيد ملكو بيبعت البعل مرسالين هني جفن وحقل (أو جفني أو حقلي) لموت ابن ايل تيخبروه بأنو البعل نتصر نهائين، وواجب يخضعلو هو بدورو. بيرد موت بانو موافق وبيدعي البعل لعزيمي بمملكتو. وبيبقبل البعل العزيمي وبيتحدى موت بالرغم من تحزير إختو "البتولي عنت". وبيوقع اللي كانو خايفين يوقع: موت بيقتل البعل. وبيعمّ الحزن والحداد. وبيسعى الإله عشتر لإغتصاب عرش البعل، بس ما بينجح لإنو كان بعدو قاصر. وبتروح عنت تفتّش عن البتسمّيه "خيّا" البعل، وبتقابل موت وبتصرعو. وبعدين بتشوف بحلم "كإنو السما عمتشتي زيت، وبالوديان عميسيل العسل". ساعتا بتفهم انو الظافر البعل بعدو طيّب. وبتخبّر ايل. اللي بيفرح وبيوعزلا تستنجد بالشمس تتسترد خيّا. وبعد الصلا والتضحيي بيعود البعل لعالم الإحيا. وبيهللو الآلها و"بتشتّي السما زيت وبالوديان بيسيل العسل". وبيتسلّم البعل سلطتو من جديد.
وبعدين بتروي الملحمي قصّة حب بين البعل وعنت اللي بتخلّفلو تور (بمعنى إبن قوي متل التور) وولاد كتار. وبيعمّ السلام ع ايدين ملكن البعل. هـ الملحمي، متلما شفنا، منا إلاّ قصة صراع ع السلطا بين ولاد ايل وقرايب ملك جبيل والعالم، اللي صار كبير بالسن. بتنتهي بقصة حب بتشرح ليش "تحزّبت" عنت لإبن عمّا البعل الكانت تحبّو ضدّ إخوتا يم وموت، الخ. بس قيمتا، متلما قلنا، أنا بتعطينا كميي من المعلومات الحضاريي اللي بتظهر بين السطور:
الملحمي-2- كرت (ملكرت) ملك الصيدونيين.
كرت من أهم الشخصيات الأوغاريتيي، وكمان من أبرز شخصيات التاريخ القديم. هو، متلما برهنّا، ملكرت الصوري، أول ملوك صيدونيا اللي بتسمّيه الميتولوجيا اليونانيي هركل.
بالملحمي الحاملي اسمو، واللي وصلتلنا ع 3 لوحات محفور ع مل واحدي منن 6 عواميد. منشوف ملك ماتو كل أفراد عيلتو وما عاد عندو ولد يخلّد إسمو، عميطلب من ايل اللي بيظهرلو بالحلم يبعتلو ولد. وبيستجيب ايل. وبيئمرو يجهّز جيش تيهجم ع بلاد أدوم، مطرح م في عروس بتليق فيه، مينا؟ حوريّي بنت الملك فابل. وبينبّهو ايل: يحاصر مدينة الملك بس ما يزتّ عليا حجر أو يضرّ انسان. وهيك بيصير. وبعد ما يشدّ كرت الحصار ع المديني بيبعتلو ملكا يعرض عليه الصلح. وبيتجوّز كرت حوريّي وبتجبلو عدة ولاد. وكان ندر لعشتروت انو ازا تجوّز حوريي بيقدم لمعبدا بصور فضا ودهب. بس ندر وما وفي. وعتبرو انو هـ الشي زعّل الآلها وسبّبلو المرض. وخدمتو حوريي بحنان، بس ما شفي. وطلب منا انا تقدم الزبايح عنو لاسترضاء الآلها. وبيجتمعو أهلو وبيصيرو يبكو ويعدّدو صفاتو متلما بيعدّدو للمريض الميؤوس منو. بسن كرت بيطلب من ابنو إلحو انو يروح يجيب بنتو تامني يخبّرا عن مرضو بلطف تما تنصدم، وبيطلب منا انا تصلّيلو وتضحّي لـ الله تيشفى. وكل هـ الاشيا كان مرافقا قحل وجفاف. وبهـ الوقت نفرد ابن كرت بالهيكل وقرّر يطلب من بيّو يتنازلو عن العرش لأنو ما عاد فيه يقوم بمهمات الملك اللي هيي: "الحكم بالعدل للأرملي وإنصاف القاصر وإطعام اليتيم وحماية الزليل"...
المهم بهـ الملحمي، متلما برفقاتا، هوي العلامات الكتيري البتدلّ ع وجود حضارا عظيمي ومبنيّي ع تديّن حقيقي وممارسات بتستحق انا تعتبر من مقدمات الأديان وخصوصن المسيحيي. ومن علامات الحضارا وجود جيش منظمّ حسب رتب معيّني وعددو بالألوف... واستخدام الاحصني والعربايت والاسطبلات والفضا والدهب والخمر والنقود...
ومن أبرز ما في بهـ الملحمي انو كرت بيتجوّز جواز ديني. وهيدي أوّل مرّا بالتاريخ بيوقع هادا. وكمان في توكيد ع ممارسة الطقوس الدينيي، متل الندر والتضحيي للآلها والغسيل قبل الصلا وتسبيح الرب بالدف والصنوج...
