كتبنا مطوّلن عن عشتروت اللي يمكن تكون واحدي من اشهر النسوان بالعالم. لهيك ما رح نتوسّع بدراستنا هون. منزكر بس بإنا اخت الملك ايل الجبيلي المعروفي بأنا إلهة الحب والخصب والجمال.

بس الشي الما نعرف عنا بشكل واضح هو انا كانت خصوصن أول ملكات العالم: تنصّبت ع هـ المنصب هي وهدد من قبل الملك ايل، يمكن سفيرا ويمكن حاكمي وملكي متجولي، ونعرفت بملكة العالم. وكمان قلنا انا حملت تقريبن 300 اسم ولقب منن فينوس وأفروديت والزهرا وعشتار وأوريونا، الخ. (كترة الاسامي والالقاب الحملوا ابطالنا المألهين كانت تدل ع قيمتن الاجتماعيي أو الفكريي أو السياسيي).

وشو عن عشتر؟ بيتبيّنلنا من الملاحم الأوغاريتيي- اللي ممكن تكون، متلما قلنا، وقعت بالخطأ لعبدا عن المنابع- انو عشتر كان إبن البعل وأشيرا. وورد زكر الجزيري العربيّي (سبا وحمير ومعين) تمامن متلما ورد بالنصوص الاوغاريتيي (ع ش ت ر) وبـ بابل ورد "أشتر". وورد بمكتوبة ميشع ملك موآب: "عشتر".

ومنستفيد من هـ النصوص أنو عشتر هو إله السقي، وانو عطى اسمو للري. ولقبو بروايات تانيي كان البيخوف ونعرف بإسم "مولوح" أو الملك. وكانت نجمتو الزهرا اللي هيّي نجمة إمو. وكانو يقدّمولو الزبايح. وبيقول إرميا انو يهوا امر العبران انن ما يقدّكو ولادن زبايح لمواوخ البيخوّف. ورفعولو العبران مزبح بوادي هنوم اللي صار حسب قول البعض وادي جهنم. وبتدمر عبدو نجمتو الزهرا اللي كان إلا اقنومين: عزيزوس (العزيز) ومونيموس (المنعم). والارجح انو الكلمتين هن لقبين لهـ الاله، ويمكن ممسلين لنجمة الصبح ونجمة المسا.

مين أِشيرا؟ أشيرا بالملاحم الاوغاريتيي هي مرت ايل وإم لـ70 إله وإلاها. والارجح انو كلمة ام هون، بتعني الام الروحيي، او الربّي والسايسي المسؤولي عن هـ الالها، لهيك كان من ألقابا (ق ن ي ت. ال.م) يعني "خالقة الالها". وكانو يلقّبوا بالربّي والسيدي وأشيرة البحر... لهـ السبب كانو يمسّلوا مرّات بشكل مرا بارعة الجمال، والقسم التحتاني من جسما بشكل جسم سمكي. وكانو يرمزولا بساريي "عمود"، او سجرا أو تمسال الخ... ونعبدت أشيرا الهي هي عشتروت بالزات بعدة مناطق من الشرق ومن الغرب.

ببلاد العموريي (سوريا)، مطرح م ورد اسما عدّة مرّات بأسامي الاعلام متل "عبدي أِشيرتا" (عبد عشتروت)، متلما نعبدت ببابل مطرح ما نعرفت بـ اشرتم. وبجنوب شبه الجزيري العربيي، نعرفت "اشيرا" بإنا مرت الاله القمر "سين" او "يرخ" او بنتو واخت الاله شمس وبتيما، ببلاط الانباط، بشمال شبه الجزيري، نعرف تالوت بيتألف من سلم وشنجلا وأشيرا. بس عند العبران، ورد اسما مرّا واحدي بالتورا. وكانو يأكلو ع مايدة ايزابيل الفينيقيي مرت الملك أخاب 4500 من كهنة البعل و400 من كهنة أشيرا. هادا بيدل ع شيوع عبادة البعل وأشيرا عندما العبران زاتن، وبيشرح سبب وقوف ايليا بوجّن. وما في لزوم نشدد ع انو عشتروت نعبدت بالأخص بكل حاضراتنا الكنعانيي-الفينقيي وخصوصن بصيدا وبصور.

وقبلما نختم هـ الكلمي عن اشيرا- عشتروت لازن نزكر انو اهميتا بالملاحم واضحا بما انو الا عدة أتباع منن دمجي البيسمّوا "إمة شيرا" وقادش.

4- قادش- وأمرار صيادين أشيرا ورسلا.

قادش بطل مأله بيورد زكرو بـ ملحمة البعل وعنت أو لوحدو أو مرفق باسم أمرار وبيظنو البعض انو اسم أمرار بينرد لجزر "مر" أو "مرر" وبيجي مرادف لاسم مبارك أو قادش، يعني مرّات ما بيجي الا كإسن تاني لـ قادش. بس يمكن يكون امرار اسم لشخص تاني ع كل حال قادش (أو قادش وأمرار) هو صياد الملكي وأشيرا- عشتروت. وقادش عطا اسمو لمطارح عديدي بلبنان الطبيعي منّا بحيرة قادش أو حمص وقادش اللي حد بحيرة الحولي.

5- مين هني جفن وحقل؟

(ج ف ن) و(ا ج ر) وبيقولو كمان جفني وحقلي، هن رسل البعل. والرسول بالاوغاريتيي هو كمان ملاك. بتزكر ملحمة البعل وعنت هـ الشخصيتين مرات عديدي وبتزكرن مع بعضن وبعض الاحيان بتسميّن آلها. بس قليل ما بيحكو او بيعملو شي بيزكر، وهادا دليل انو دورن زغير.

ويمكن يكون جفن عاطي اسمو للجفن ويمكن للكرم والداليي. ويمكن يكون اجر بيعني الاجرا والمكافئا. وبيقرى اسم اجر بلفظة "أ غ ر ت" "أوغاريت" اللي بتعني ببعض اللغات الشرقيّي الحقل. بنصوص سنخوني اتن، الارجح انو هـ الالهين هن أغرور واغرويروي.

هادا متل ما بيظنو بعض المأرخين. نحنا مش من هـ الراي لانو سنخوني اتن بيقول عن واحد منن انو كان "لتمسالو ومعبدو الحملو ونقلو خفيف، احترام كبير بفينيقيا". وانو "سكان جبيل، خصوصن كانو يعتبروه، اكبر الآلها". هـ الكلام ما ممكن يكون يعني الرسولين الزغار جفن وحقل. ع كل حال بيضل أمرن غامض وما في مجال لتوضيحو استنادن للمعلومات اللي عنا.