الملك كرت أو ملكارت- هركل ملك الصيدونيي هو بملاحم أوغاريت رب عيلي عادي وقايد جيش جرّار.
أ‌- شو عن كرت؟ بترويلنا ملحمي من الملاحم الاوغاريتيي قصة الملك كرت، ملك الصيدوني، (والصيدونيي هن متلما منعرف أهالي صيدون وصور). منفهم من هـ الملحمي انو هـ الملك مرقت فترا طويلي من حياتو ما نزكرت بالملحمي بالتفصيل بس تنوّه عنا. بتقول الملحمي انو كان لكرت مرا وولاد ونزلت عليه مصيبي وفقدن. وهيك بتهمل فترا طويلي من حياة كرت يمكن تكون اللي بيحكو عنا اساطير الاغريق والرومان. وبما انا درسنا هـ الموضوع بالتفصيل ما رح نرجعلو. منكتفي هون ببعض المعلومات عن كرت وعيلتو الجديدي متل ما بتوصفلنا هن الملاحم.
بأول الملحمي منشوف كرت تعيس ووحيد وعميطلب من ايل يوهبو وريس لعرشو. بيستجيب ايل لـ طلبو وبيئمرو انو يروح ع راس جيش جرار يطلب إيد حوريي بنت الملك فابل، ملك أدوم اللي بأطراف كنعان الجنوبيي.
ولشو الجيش الجرار؟ يمكن تيعطي كرت الملك فابل وهرتو وما يعود يتجرّأ يرفض طلبو. بهـ المناسبي عنا بعض الملاحظات:
أولن منتساءل ازا ما كان توجّه كرت ع راس جيش جرار ما بيعني أكثر بكتير من طلب إيد بنت. برأينا بيعني هـ الامر انو الملك قابل هو تحت سلطة ملك الصيدونيي وانو يمكن يكون حاول التخلص من هـ السلطا، الشي اللي خلّي الملك كرت "يهزّلو العصا" ويردو للطاعا، بس بدون ما يدمّرلو مملكتو. وهـ الحرب السلميي هيي من الشيم الكنعانيي- الفينيقيي.
ملاحظا تاني بتخص الجيش: كل العلما الدرسو عن قريب ملحمة كرت تعجّبو من وجود جيش نظامي بيرجع لإيام الملك كرت، يعني لبداية الالف التالت، بالعدد اللي يتزكرو الملحمي . وبالفعل منقرا بملحمة كرت عن جيش هـ الملك انو كان:
"جيش من ازكى الجيوش (من المحتارين)
"جيش عظيم كتير
"300 ربوي
"مرتزقا ما بتنعدّ
"ونتويين ما إلن حصر.
"عميشوفو الوف متل الشتي النازل وربوات متل بواكير الشتي.
تنين ورا تنين بيمشو
تلاتي ورا تلاتي بيمشو"...
فازت كان جيش كرت يعد الالوف وكانو جنودو من المرتزقا بس كانو محاوطين "بالمختارين" وهيك رح يكونو جيوش فينيقيا بكل العصور. جنود مأجورين بيترأسون ضباط من نبلا فينيقيا. ومنتأكد من هـ الامر لما مندرس الجيوش الكرتاجيي عن كسب. ساعتا منلاحظ إنّا ضلت هيك لآخر يوم، يومة الحرقو حالن الـ 900 بطل من الضباط البينتمو "للفرقا المقدسي" مع مرت آخر ملك للحاضرا، هدور بعل وولادا، تما يشوفو زلّ كرتاجا.
وهون لسبد من القول إنو الاعمال الحربيي والجيوش كانت هي كمان تحت شعار الله: كانت تتسمّى "مقدّسي".
ومنتزكر بهـ المناسبي انو تور- هرمس الجبيلي، رجل الله الاعظم بالعصور السابقا للمسيح، كان يكرّس كل شي لـ الله، ويريد انو كل اعمال البشر تتم تحت شعار القداسي. ومنشوف بملحمة كرت إشارا للشارات أو "الرايات المقدسي". هيدي كانت تتقدّم جيش كرت، وكل الجيوش الكنعانيي- الفينقيي. واللي بيأكد هـ الفكرا عنا انو هـ الرايات كانت بيأكد هـ الفكرا عنا انو هـ الرايات كانت معاصرا لابطال عصر تور وايل وملكرت، يعني راجعا لبداية الالف التالت. يمكن لهيك ضلو القدما يطلقو ع الشعارات العسكريي اسم "الفينيقيي". ومهم نزكر انا ضلت بلون الارجوان لحد عصور متأخرا. وكانو يرفعوا قدام الجيوش ليعلنو بدء المعركي. هيك كان سكندر يشهر راية "الفونيكيس" الارجوانيي قبل بداية معاركو كلا.
من معالم تقديس الاشيا انو القوّاد كانو، قبلما يبلشو بالقتال، يقومو بطقوس دينيي عديدي، منا غسل الايدين للكوع ومباركة الخبز والخمر، وتقديم الزبايح والصلا، الخ.
وبيضيق المجال هون عن الحكي عن السلاح المستعمل (الرمح والحربي والقوس والنبلي، الخ)، ولا منقدر نتوسّع بالعمليات الحربيي (ومنا الحصار اللي عملو كرت بحملتو ع آدوم)، ولا باستخدام الخ. منكتفي بالقول انو شخصية كرت عن عدة نواحي من حضارة فينيقيا. ودرسا بتفصيل بيملي صفحات.
ب‌- ترى حوريي هيّي هورا سنخوني اتن العطت إسما للحريي، وواحدي من حوريات اليونان اللي عطت اسما للساعا (هورا)؟
ميني حوريي؟ بيزكر سنخوني اتن هـ الاسم مرّا واحدي. بس أوزيب ما توسّع بالفقرا اللي نزكرت فيا هـ الإلها. لهيك ضلت مجهولي. بس صرنا نعرف انو هورا او حوريي مزكورا باليازة هوميروس. كمان إجا زكر الحوريات بالقرآن. بس حوريات اليونان هني بنات بيحرسو باب السما، ويمكن تكون واحدي منن حورية الملاحم والباقيين اتباع الا.
بس حورية الملاحم هي اميرا بتليق بالملك كرت: "جمالا جمال عنت وحسنا حسن عشتروت، لفتتا لازورد وببوّ عينا كاس صافي". وبيتجوّزا كرت دينيّن (وهي المرّا الاولي اللي بيزكر فيا التاريخ زواج ديني، وهادا مساهمي منا بمسودات المسيحيي)... وبيبارك زواجن ايل بالزات، وبتخلّف حوريي لكرت عدة ولاد (يمكن 8 لان بينن بنت اسما تامني). وبتعيش حوريي مع كرت كزوجي وربّة بيت صالحا، وبترعاه بحنان وقت مرضو لبينما يشفى ويرجع لكامل نشاطو.
منكتفي هون باللي قلناه عن هـ البطلي اللي حكينا عنا بجريدنا بالتفصيل. واللي مكن تكون عطت اسما للحريي وللساعا بلغات أوروبا، ويمكن تكون هيرا اليونان وجونون الرومان.
ج- شو عن الملك فابل؟
ملك ادون هوي عاهل المقاطعا اللي بتوقع بآخر جنوب كنعان. بيبين كملك صالح بيريد رفاهية شعبو وبيكره الحرب. لهيك بيبعت رسلو للملك كرت ليعرضو عليه "تقدمات سلام": فضّا ودهب وعبيد ومركبات خيل. (وهيدي علامات الرفاهيي البيعيش فيا شعبو) بس كرت بيأكد للرسل انو مش جايي يحارب فابل وأهلو انو جايي تيطلب إيد حوريي الحلوي كتير وياخدا.