وما نحصرت عبادة مينرفا بس بروما نتشرت بمدن ايطاليا. ووصلت لأطراف الامبراطوريي. لقيو مكتوبات- تقادم لمينرفا بـ باريوم وكروتون وبليزنس وبريكسيا وفيرونا. وعرفوا باسم مينرفا برسنتيا بـ البنقان ودمجوا بـ غاليا، إلهة التجارا والصناعا، وبـ بريتانيا مع إلهة الينابيع المعدنيي (أكوا سوليس) وبـ نيم عبدوا مع مركور ونبتون وفورتونا. ووصفوا متلما وصفوا باليونان بإنا ربّة البرق والقمر. كل هـ الدلايل بتأكدبدون شك بإنو مينرفا إلها أخدوا هي كمان عن فينيقيا ويمكن عن طريق اليونان.

مبلى اتينا ومينرفا هنّي آلها واحدي، وهي عنت اوغاريت وتانيت كرتاجا ونويت مصر واناهيد فارس وميزوبوتاميا.

مننهي دراستنا بقولنا إنو ما في شك بكون عنت اوغاريت هي نيت او تفنويت مصر وأناهيد ميزوبوتاميا وفارس، وبالأخص تانيت كرتاجا وأتينا اليونان ومينرفا الرومان. وازا تزكّرنا انو ملاحم أوغاريت بترجع للقرن الـ 14 قبل المسيح، بينما قمّة الشعر الملحمي اليوناني ايام هوميروس، (وما ننسى انو هوميروس من لبنان متلما رح نشرحا غير هون) ما بترجع لابعد من القرن العاشر، وقتا منتزكّر انو الارض الل طيلعت الملاحم وقصص الآلها هي لبنان. ومن اليوم من خلال ملاحم إيبلا الما منعلافا بعد، تنعرف شخصيّة عنت بشكل أوضح، منكتفي بقولنا انو هـ الإلها كانت فعلن ملكي عظيمي، ربة حرب بقدر ما هيي ربة سلام، وبالأخص ربة فكر وحكمي (ويمكن لهيك بيقول سعيد عقل، عملتا الا اساطير اليوناني خلقاني من راس بيّا زوش ايل، كأنا عمتقول إنا بنت العقل، وهيي واحدي من أقوى ركايزنا التمدينيي بعصر تور- ايل يعني عصر الالها، الل شعّ من لبنان ع العالم، بـ بداية الالف التالت قبل المسيح.

أبطال بملحمة دان ايل او اقهات ابن دانيال المألهين: دان ايل القاضي الملك، دنتييّ مرتو، أقهات ابنو، قعت بنتو أوّل عالمة فلك، المرّ، الكشرات بنات هلال، الامير حيلي، يطفان.

شخصيّات ملحمة دان ايل او اقهات ابن دانيال.

سبق ولخّصنا ملحمة دان- ايل (او دانيال) بـ جريدتنا "لبنان"، وقلنا انا بتخبّر قصة رجّال نبيل سليق الرفاييم الهن واحد من فروع الجبابرا. إسمو بيعني دان الله يعني ايل الديان او ايل البيدين، ولقب من ألقابو "الهرنمي" البيفسّرو بعض الشرّاح بإنّا نسبي لمنطقة الهرنم او الهرمل.

وما كان عند دان ايل، القاضي العادل، إلاّ بنت وحيدي: وصلّي للبعل وطلب منو يتوسّطلو عند ايل تيعطيه صبي يخلّدلو إسمو. عطاه أقهات. وكبر الولد وفرّح بيّو. وفي يوم هداه المعمار كاشر- وخاسس قوس وجعبي. وتغلغل أقهات، بجبال لبنان، بقصد الصيد بس لتقى بعنت الإلها الصيّادي. طلبت منّو القوس، رفض يعطيا هو رغم كل الوعود العطتو ياها بمنحو الخلود والقيامي من الموت. وصار يتمسخر ع الخلود. لهيك بعتتلو خادما يطفان تيقاصو. بس يطفان قتتلو بالغلط وحزنت الالها حزن كبير وقرّرت لإنّا تقيمو من الموت. بهـ الوقت تفجّر حزن دانيال وطلبت منو بنتو فغت انو يسمحلا تاخد بتارخيّا، سمحلا، ولبست لباس جندي وقصدت يطفان (هون بينتهي النص الباقي من الملحمي).

بس شخصيات الملحمي هن: دانيال، البيّ، واقهات الابن، ودنتي الام وفغت، البنت، والمرّ، صاحب الاكمي الحاملي اسمو، ويطفان خادم الست عنت، وهرجبا بيّ النسور، وسملا إم النسور، وبنات الهلال السنونوات.

هيدا عدا عن الالها تور- ايل والبعل وعنت والامير القمر الل صرنا نعرفن. قبلما ندرس شخصيات ملحمة دانيال بيسوى نلاحظ انو، عكس الل صار بخصوص باقي الشخصيات، ما لقينا بعد مين يمسّلن بين آلهة اليونان والرومان. بالرغم من وجود اسامي دان ودانايي وداناوس ووجود بلد بيحمل اسم الملك دان أو دان- ملك هو الدانمرك بعد ما توصّلنا نلاقي شخصيات هـ الملحمي بين حطام الميتولوجيات. كمان ما لقينا لهـ الشخصيات اسار بالتويونوميي اللبنانيي: ما في اسامي لمدن أو ضيع شبيها بأسامي ابطال هـ الملحمي. وبرأينا انن يمكن يكونو من حملة اسامي عديدي. ونعرف هادا من دراسة باقي الابطال. وحتى نتعرّف ع اسامين التانيي،- وهادا يمكن نتوصّلو من خلال ملاحم ابيلا-، منكتفي بإنا نقول عنن الل منعرفو من خلال ملاحم أوغاريت.

أ- دان ايل القاضي الملك:

مش واضح انو بالملحمي انو دان ايل هو ملك. بس منعرف انو الرفائيم (ودان ايل رفائي) هن من الجبابرا، الهن من ملوك كنعان- فينيقيا. منعرف عن دان ايل انو كان متعبّد لـ الله والآلها: منشوفو "عميحضّر الولايم" و "يسقي بني القدس"، و"يعمل نصب لـ آلهة بيّو بالحرم المقدس"، و "يسقي بنات الهلال السنونوات"، ويتضرّع للبعل ت يساعدو عند ايل ويرزقو صبي يورت إسمو.

وبيستجيب ايل لـ دعواتو وبيعطيه صبي هو أقهات.

ومنعرف انو دان ايل شخصيي مهمي، وازا ما كان ملك، بيكون ع الاقل قاضي: منشوفو متل ملوك العصور القديمي وقضاتا قاعد عند البوّابي (بوابة المديني).

حد الأكداس عند البيدر، تيحكم للأرملي ولـ "اليتيم".

وهون بيسوى نلاحظ انو هـ العادي بالحكم هي كنعانيي- فينيقي وإنو اكتر العظما من ملوك العهود القديمي أخدوا عن الكنعانيي- الفينيقيي ومنن العبران، ومنن اليونان والرومان، خصوصن ملوكن الكانو متحدّرين من أصل فينيقي (منن كان همتيون، حاكم جزيرة ساموس، وخيّهرمونيا مرت قدموس) وكان دان ايل حد ايمانو بالله والالها بآمن بالسحرا والعرّافين. (قبلما يدفن إبنو أقهات، منشوفو عميقرا الغيب بجوف النسورا ويشقّ أكبادا وبعدين دفنو). ع كل حال منستنتج إنو دان ايل هو بدون شك من سلالة الآلها. هو البيقول بزاتو.