خلطو القدما قصة عشتروت- افروديت بقصة اوروب. قصّة اوروب حكيناها بجريدة "لبنان"، وقلنا انو "حلوة الحلوات" كانت بنت أجنّور ملك صور يعني اخت قدموس الالهي، وهيّي الخطفها تور ملك كريت الملقب باستيريون. وخبرو اليونان انو "تور بيشبهو قرونو هلال القمر". وراحو بنائن لطلب بيّن اخوة اوروب تيستردّوا، وحتلوا العالم. بس هـ القصا حصلت بنص الالف التاني، بينما عشتروت معاصرا لتور وايل، يعني من اول الالف التالت. مع هاد كلو، كتار من القدما خلطو بين اوروب وعشتروت-افروديت. ليش؟ كانت اوروب حاملي أسامي وألقاب عشتروت، المنها "فينيقيا" "وايلوتي"، "ومينيرفا". وحملت رموزها (التور، القمر...) ومش بس اليونان، كمان بصيدا وصور كانو يسمو اوروب عشتروت، وكانو يسمو اوروب عشتروت، وكانو بانيين معبد لاوروب- عشتروت. ومنعرف كلنا علاقة اوروب بالتور الحملها لكريت متل ما منعرف علاقة عشتروت وايزيس وإيو بالتور والبقرا.

وهون لازم نلاحظ انو عدّة بطلات حملو بهالتاريخ اسم ارورب. وبرأينا انو اللي دمجوا بعشتروت، هيي اوروب الاولانيّي، وهيي العاشت باول الالف التالت قبل المسيح. وهـ الاوروب بيعتبروا بنت اوقيانوس وتنيس، ويمكن يكون اسم اوروب، هـ المرّا كمانن لقب من القاب البنات الحلوين اللي بمقدّمتن كانت عشتروت. ع كل حال اوروب- عشتروت هيي حتمن غير اوروب اخت قدموس العاطيي اسما لقارّة اوروبا.

عشتروت- افروديت هيي يا ترى هرمونيا المن عصر تور وايل؟

معروف عن هرمونيا إنا مرت قدموس العظيم، متل ما معروف عن اوروب إنا إختو. بس الاساطير بتقول إنو هرمونيا هيّي بنت افروديت- عشتروت والمرذيخ- آرس، او بنت زوش والكترا او واحدي من بنات أطلس، وإم الامازونيات. بس أطلس وأفروديت والمريخ وزوش وإلكترا كلّن من ابطال أول الالف التالت، بينما قدموس من نص الالف التاني. لهالسبب بيفكّرو المأرخين انو فيه ع القليلي بطلتين حملو هـ الاسم، منهن مرت قدموس ومنهن واحدي من أوّل الالف التالت يمكن تكون عشتروت او بنت من بناتا.

والقصص القديمي بتخبّر عن هرمونيا خبار كتيري، منها انو "هرمونيا هاجرت من صيدا أو صور وعادت ختفت تحت هيئة تور". بعدان تجوّلت بالمناطق التجوّلو فيا افروديت وايو واوروب... وكانو بفينيقيا يعيّدو لهرمونيا ولاوروب نسوا، يمكن لانن قرايب ويمكن لانن دمجون مع بعضن، ودمجون مع عشتروت.

عشتروت- افروديت سمّوها كمان ديدون

منعرف انو ديدون هيي اليسا العظيمي، الملكي الصوريي الاسست قرطاجا، "زهرة العمر اللبناني". بعض المأرخين بيقولو إنّن لقبو الملكي إليسا ديدون لانها هربت من صور.

والحقيقا إنا كلمة ديدون من (من "دد"، وبعد عنّا من مشتقاتها كلمات "وداد" و"ودّ"...) بتعني "الحبيبي" مش الهاربي. ويمكن لانو عشتروت سافرت برّا لبنان تلقّبت بـ"ديدا"، وكمان لانها محبوبة الكل. ونعطى هـ اللقب من بعدها لاليسا، وصارو القدما يدمجو بين البطلتين ويصورون سوا ع مسكوكات صيدا وصور، او يعبدون بمعبد واحد وبيزيد مارتن، البيروي قصص البطلات الألهون ودمجون بعشتروت، انو مش بس حكايات إيو وايزيس وهيلاني واوروب وهرمونيا... كمان حكايات ميدي ودميتر وهيرا وافيجينيا وارتميس وغيرن "مأخودين كلّن عن اصل واحد هوي حكاية عشتروت الفينيقيي مع بعض اضافات وتغييرات".

عشتروت هيي أفروديت وفينوس اليونان والرومان

من اشهر اسامي عشتروت اسم افروديت اللي نعرفت فيه عند اليونان، واللي قلنا انو فينيقي. افروديت اليونان نعرفت بالاخص بمغامرات حب كتيري، اشهرها حبّا لادونيس، الشي البيأكد جنسيتها الفينيقيي. والارجح انو ال أغلب مغامراتها من إختراع خيال اليونان الحرّفو كل تاريخنا. وكألهة الحب والجمال، تغنّو فيا كل شعرا العالم القديم، ونحتولا النحّاتين تماسيل، وعبدوا بكل الارض. وبعدا قواميس الميتولوجيا بتروي قصص حبا وغضبها ورضاهاه ع الناس. وبعدن بيخبرو انو بينها وبين اتينا وهيرا، نقّاها سكندر (الهو ياريس خاطف هيلاني وبطل ملاحم طروادا) كأجمل الاها، ورميلا التفاحا المشهورا. وهون كمان لازم نلاحظ الغلط بالتواريخ، بما إنو افروديت عاشت بالالف التالت وباريس بالقرن الـ13، الأغلب انو قصة التفاحا تكون حصلت بشي مباراة اشخاصها تماسيل الالاهات مش الالاهات بزاتن.

وبأغلب مدن اليونان نعرفت افروديت باسم الاورانيّي، نسبتن لبيّا أورانوس- شميم السما.

ونعرفت افروديت عند الرومان باسم فينوس، وعتبروا حامية روما الخاصا، باعتبار انو إيني إلهو بيّ روميلوس باني روما، هوّي، برأي الرومان، من سلالة افروديت-فينوس، ولانو بيّن روميلوس وكانو يعتبرو حالن من سلالة ايني، عمّر يوليوس قيصر لـ"فينوس جنيتريس" (الام) هيكل خاص فيا بروما.

افروديت-عشتروت الاورانيي ملكي ع اميركا كمان.

مبلى، بكل اقطار العالم لتقت آسار عشستروت وبعدا عمتنحكى اساطيرها. بهوندوراس بيخبّرو انها إجت من الجو وعمرت هياكل ومدن، ورجعت طارت صوت البلاد الإجت منا. بالبيرو وببوليفيا وكولومبيا، بمملكة الإنكا القديمين بعدا ىسارها وىسار رفقاتا محفورا ع "البويرتا دل صول" بتياهو اناكو وبعدّة مطارح تانيي. وكتبت غارسيلازو دي لافيكا: "إجت اوريونا-يعني فينوس الاورانيّي- ع مركبي فضائيّي بتلمع اكتر من الشمس". ومش بس باميركا، كمان بسيبيريا الشرقيي لتقت علاماتها وعلامات رفقاتا وبالاخص تور وايل.

شو منستنتج من دراساتنا لعشتروت؟ إنو المرا الفينيقيّي كان إلها شأنها بالحكم متل الرجّال، وكانت تتصرّف متلو بكل شي. وكانت محافظا ع أنوستها، ومرّات كان جمالها وحدو رسالة رفاهيي للارض. ومنستنتج بالاخص انو الفينيقيي، ايام عشتروت، كانو حاكمين ع الدني كلا، واصلين حتى لسيبيريا ولاميركا.. والدراسات الدقيقا بتخوّلنا نقول وحتى بكل القارّات والجزر البارزي بالارض. إي، عشتروت كانت اول ملكي ع العالم كلو، بس رح تضلها أكتر من هيك: ملكة الجمال والحب.