قلنا انو اسم ايل قليل ما بينزكرلوحدو وهيك ايمو تور. بالعكس عن اسم تور- ايل اللي بيورد تقريبن بكل صفحا بشكلو المزدوج. منبرّر هـ النظرا هيك: انو كتّاب أوغاريت، متلن بهـ الشي متل كل الكتاب القدما، شوّهو كتير من المعلومات اللي وصلتلن مش عن قصد وتصميم، بس لانو الكتابي الهيروغليفيّي بتنقل "ضباب الافكار"، متلما بيقول سعيد عقل، مش الأفكار، وانو امكانية الوقوع بالخطأ عند نقلا وارد حتمن. وبما انو الابجدي خترعوا بنص الالف التاني، معلوم انو كل شي وصلنا من قبل هـ الاختراع بيكون معرّض التحوير بالمبنى والمعنى. والبيساعد ع هـ الامر انو كلمة ايل بتعني "الاول" متلما سبق وقلنا وانو الملك كرونوس حمل هـ اللقب ع عتبارو ملك الملوك وراس الهرم المجتمعي وكمان تور حمل هـ اللّقب وتسمى ايل وآدم (يعني الاول واللي هو قدّام) وآدم- ايل (كدميل وكميل) لأنو كان الاو بين العباقرا ورائد النخبي الفكريي بفينيقيا.
وهيك صار سهل، خصوصن بنصّ شعري، انو يحصل دمج انو يحصل دمج بين شخصيات تور وايل، وانو تلبس الشخصيي الوجّا مزدوج، مرّا صفات تور ومرا صفات ايل.
ومهم نعرف انو اسم تور بيورد بالاول، الشي اللي بيبرهن ه انو عصرن اللي نعرف بـ "اول عصر لسعادة الناس" وبـ "أول عصور الارض الذهبيي"، انو نطبع بعبقرية تور اكتر منو بشخصية ايل.
-تور- يل الملاحم بيمسّل كمان شخصيّة الله.
الملاحظا الاخيرا الإلا اهميتا الكبيري بالنسبي لفهم شخصية ايل- تور المزدوجي، متل ما بتبيّن من خلال الملاحم، كون هـ الشخصيي بتلبس كمان طابع إلهي بيعمل منا ممسّلي لإلله تقريبن متلما منفهمو اليوم. من صفات ايل انو الاله الاعظم، رب الآلها، وبي البشر وخالق الخلايق بأني البنووت والسرمدي (آب سنم أو آب السنين- كرونوس)، واله الامم والعلي واللطيف الرحوم والراعي (رع) والمحب للسلام وبادر المحبي بالعالم وهلق سؤال الاسئلي: ليش ممكن يكونو الاوغاريتيي دمجو بين تور وايل من جها، وبينن وبين الله من جهّا تانيي، تبيّنو التلاتي وكأنّن شخصيّي واحدي؟ يمكن لان تور وايل متلما قلنا، كانو يحملو لقب "ايل"، ولان تور هو اول مين بشّر بالله لابس الصفات اللي قلنا انّا صفات الله، وكمان لانو الله هو اكتر من ايا مخلوق خلقو، الاول بين الاول، وهيك هو كمان، قبل كل الاولين، كان يحمل لقب ايل. وهـ اللقب هوّي هوّي اللي حل مع الوقت اسمو بالزات، اسمو الليقليل ما نلفظ، لان البشر عتبروه لغز محاوط بحرمي ما بينخرق.
رح نختصر ونقول: ابحاسنا بتخوّلنا نتكهّن انو الملاحم الاوغاريتيي، بسبب بعدا عن المنابع، بتعاني متلما بتعاني اكتر الكتوبات والكتابات القديمي (اللي منا التورا الموسويي) من كترت التناقضات والبلبلي والتغيير والنحريف، وانو من مسببّات هـ الاخطاء هن الكتاب اللي دمجو شخصيّة تور بشخصية ايل، وهيك اجت تعاليم تور ع لسان الملك ايل ولبس ايل شخصية الله متلما بيوصفو تور.
-ايل بتوراة موسى
ورد اسم "ايل" بالتورا بشكلو المفرد 226 مرا كاسم لالله وكمان ورد بشكل "ايلوها" 57 مرا بس ورد اكتر بكتير بطريقة الجمع: 2570 بشكل "ايلوهيم"، و9 مرات بكل ايليم وكمان زرد مع ال التعريف للدلالي على الله. واكتر المرات اجا وحدّ منو صفا متل "ايل الحي" او "ايل عليون" او "ايل شدّاي" او "ايل بيت ايل" او "ايل ايليم" الل هيي مرادف لايلوهيم.
وكمان ستعملو كتير، بالتوراة وبغير كتابات من لبنان الكنعاني، أسامي الاشخاص المركبي من ايل (وكلمة ايل اكتر المرات بتعني الله مش الملك). وبمقدمتن اسم اسرائيل. واليازر او اليعازر ودان ايل وايل –كنعان وجبرائيل (قوة ايل) وميخائيل (مين متل ايل)، ورفأ- ايل (رفق- ايل) ونتنائيل وحزقيال، الخ.
وصرنا نعرف انو نسبة الاشيا لايل واردي بالتورا متلما هي واردي بالنصوص الاوغاريتيي. بحيس منشوف بالتورا كلمة "جبال ايل" و"أرز ايل" تمامن متلما منقرا كلمة "جبل ايل" و"برية ايل" و"بحر ايل" و"حقول ايل" (شدم ايلم) اللي زكرنا انو منا كلمة شانزيليزيي بباريز وبروكسل وغيرن بالملاحم الاوغاريتيي.
